Naangol ang usa ka 37-anyos nga lalaki human kini gitigbas sa laing lalaki sa Barangay Malipayon, Pangantucan, Bukidnon pasado alas 11:00 sa gabii Hunyo 14, 2026.
Sumala sa imbestigasyon sa Pangantucan Municipal Police Station, giingong naka-inom og makahubog nga ilimnon ang biktima ug nakiglalis sa asawa sa suspek samtang kini nagkuha og tubig duol sa ilang pinuy-anan.
Matod pa sa kapolisan, misulay matod pa og panumbag ang biktima sa asawa sa suspek hinungdan nga miduol ang suspek aron depensahan ang iyang asawa. Didto na gikuha sa suspek ang usa ka sundang ug gitigbas niya ang biktima nga naigo sa wala nga bahin sa likod, wala nga bukton ug mga kamot.
Gilayon nga gitabangan sa mga BPAT personnel ang biktima ug gidala sa Bukidnon Provincial Hospital sa Kibawe alang sa dugang medikasyon.
Samtang ang suspek giturn-over sa Barangay Captain ug BPAT personnel ngadto sa Pangantucan MPS alas 7:30 sa buntag karong Hunyo 15, 2026. Nagpadayon na usab ang kapolisan sa pag-andam sa mga kasong ipasaka batok sa maong suspetsado.
Photo Courtesy:Pangantucan MPS
