Patay ang usa ka bana samtang anaa pa sa talandugon nga kahimtang ug nagpaalim sa balay tambalanan ang asawa niini human sila gipamusil sa wala mailang suspek pasado alas 10:20 sa buntag, Hunyo 15, 2026, didto sa Purok 4, Sinuda, Kitaotao, Bukidnon.
Ang mga biktima giila nga si alyas “Toto”, 53-anyos, ug ang iyang asawa nga si alyas “Inday”, 37-anyos. Sumala sa imbestigasyon, nagsakay ang mga biktima sa ilang motorsiklo, nga usa ka Honda XRM 125, ug padulong unta sa pagbisita sa ilang anak.
Apan pag-abot sa lugar nahitaboan, kalit silang gipusil sa suspek sa makadaghang higayon. Tungod niini, grabeng samad ang naangkon sa lalaking biktima nga maoy hinungdan sa iyang hinanaling kamatayon, samtang ang babaye nga biktima nakaangkon og samad sa tiyan ug karon padayon pa nga nagpaalim sa ospital ug anaa na sa luwas nga kahimtang.
Sa pagkakaron, nagpadayon ang imbestigasyon sa kapolisan aron mailhan ang suspek ug masuta ang motibo sa maong krimen.
Photo Courtesy: Kitaotao MPS
