Boluntaryong mitahan sa iyang kaugalingon ngadto sa mga otoridad ang usa ka 47-anyos nga kanhi miyembro sa Militia ng Bayan (MB) nga giilang si Alyas “Tamsi” niadtong Hunyo 13, 2026, didto sa Don Carlos, Bukidnon.
Base sa taho ang nasangpit nga indibidwal pormal nga miadto sa Bukidnon 2nd Provincial Mobile Force Company (PMFC) Headquarters pasado alas 3:15 sa hapon.
Si Alyas Tamsi giingong kanhi sakop sa nabungkag nga Dismantled Guerilla Front 68 (GF68, SRC4, NCMRC). Ang iyang pagsurender resulta sa hiniusang intelligence-driven operation sa Bukidnon 1st PMFC sa pamunoan ni PMAJ Jessie James M. Lasdoce, kauban ang 1003rd Maneuver Company (RMFB 10) ug Bukidnon Provincial Intelligence Unit, diin ang maong surrenderee kasamtangan karong gipaubos sa debriefing ug profiling.
Tungod niini, padayon nag-awhag si Provincial Director PCOL. Oliver Sotto Navales ngadto sa uban pa nga mga nabilin nga nalambigit sa armadong pakigbisog nga mokanaog na ug itugyan ang ilang mga armas. Iyang gipasiugda nga ang pagbalik sa sabakan sa balaod mao ang saktong dalan aron makab-ot ang kalinaw ug matabangan ang pagtukod og usa ka mas hayag ug malinawon nga kaugmaon alang sa tibuok probinsya sa Bukidnon.
Photo Courtesy:BUK 2nd PMFC
