Pormal nang gipirmahan sa Department of Trade and Industry Region IX ug Local Government Unit sa Siay, Zamboanga Sibugay ang Memorandum of Agreement alang sa pagtukod sa Solar-Powered Calamansi Processing and Preservation Center niadtong nakalabay nga adlaw.
Gipangulohan ang DTI Region IX ni Regional Director Engr. Al-Zamir I. Lipae, uban si DTI Zamboanga Sibugay Provincial Director Ma. Rovie Manzanares, samtang ang LGU Siay gipangulohan ni Mayor Julius M. Acosta Jr.
Adunay kinatibuk-ang proyekto nga kantidad og 7 milyon 979 mil ka pesos ubos sa Shared Service Facility o SSF Project. Ang sentro pagbutangan og mga ekipo alang sa pagproseso ug pagpreserba sa calamansi aron mapalawig ang shelf life, mapaayo ang kalidad ug makahimo og mga produktong mas taas ang value.
Apil usab sa proyekto ang Calamansi Processing Equipment ubos sa RAPID 4M nga gilauman nga makapalig-on pa sa kapasidad sa pagproseso. Tumong sa maong inisyatiba nga matabangan ang mga lokal nga calamansi producers ug processors, makamugna og dugang oportunidad sa negosyo ug mapalapad ang merkado sa mga produktong calamansi sa Siay.
