Nasikop ang duha ka lalaki atol sa gipahigayon nga Anti-Smuggling Operation sa Kapulisan sa Glan MPS sa Purok DTR, Barangay Calabanit, Glan, Sarangani Province, alas-10:45 sa gabii niadtong Oktobre 2,2026.
Ang mga dinakpan naila nga sila si Alyas Totskie, 29-anyos, minyo, ug drayber, residente sa Barangay Glan-Padidu, ug alyas Dondon, 38-anyos, minyo, residente usab sa Barangay Calabanit, Glan.
Subay sa imbestigasyon sa kapulisan, nagpahigayon sila og checkpoint operation isip kabahin sa ilang hugot nga kampanya batok sa smuggled nga sigarilyo dihang miagi ang duha ka suspek nga sakay sa usa ka Honda Beat nga motorsiklo.
Apan, dihang gipahunong sa mga pulis ang motorsiklo, aksidenteng natagak ang usa ka pink nga eco bag nga adunay sulod nga mga sigarilyo.
Sa pag-inspeksyon sa kapulisan, nasakmit gikan sa maong bag ang 15 ka ream sa gituohang smuggled nga sigarilyo nga adunay brand nga GAJAH BARU, nga gibana-banang mokabat sa ₱12,825 ang kantidad.
Sa pagkakaron, anaa na sa kustodiya sa Glan MPS ang duha ka suspek samtang gipangandam na ang tukmang mga kasong ipasaka batok kanila.
