Patay ang usa ka lalaki human dunggaba sa Polomolok, South Cotabato, samtang misurender na sa kapulisan ang giingong suspek sa maong krimen.
Matud sa pag-umangkon sa biktima nga si alyas Jean, dihang gihinabi sa Juander Radyo Gensan News Team, nakita pa niya ang suspek nga miadto sa ilang panimalay ug nakig-istorya sa iyang kuya niadtong buntag sa September 28, 2026.
Milakaw dayon ang maong lalaki, apan pagkahapon, nakadungog siya og mga hulga nga posibleng madisgrasya ang iyang kuya kon mogawas kini sa ilang panimalay.
Gisulti usab ni alyas Jean nga dugay na matod pa adunay isyu nga nalambigit sa usa ka babaye nga giingong adunay relasyon sa biktima, apan wala niya kini makumpirma tungod kay wala siya mismo makakita sa nahitabo.
Samtang, anaa na sa kustodiya sa kapulisan ang giingong suspek alang sa tukmang proseso sa balaod. Matud sa pamilya, ilang unahon ang mga kinahanglanon alang sa paglubong sa biktima, sa dili pa ipadayon ang pagsang-at og kaso batok sa responsable sa kamatayon sa biktima.
