Gipahigayon ang panagtagbo tali sa mga municipal mayor sa Distrito Dos sa Zamboanga Sibugay ug sa Community Environment and Natural Resources Office o CENRO aron hisgotan ang mga hagit nga giatubang kalabot sa Solid Waste Management ug pagpangita og mga angay nga solusyon.
Atol sa maong meeting, gihisgutan ang mga nagkadaiyang kabalaka kalabot sa pagdumala sa basura ug ang mga posibleng lakang nga mahimong ipatuman aron mas masiguro ang hapsay ug responsableng pag-atiman sa palibot.
Gipasiugda nga ang pagpadayon sa kalimpyo sa komunidad dili lamang alang sa pagpanalipod sa kinaiyahan, kondili importante usab aron mapanalipdan ang panglawas ug kaayohan sa matag pamilya.
Pinaagi sa hiniusang paningkamot sa mga lokal nga panggamhanan ug CENRO, gilauman nga mapalig-on ang mga programa ug estratehiya alang sa mas limpyo, himsog ug malungtarong Distrito Dos.
Kabahin kini sa tumong nga mapalambo ang kalidad sa kinabuhi sa mga residente ug matuman ang adbokasiya nga “HAPI ug HEALTHY ang matag pamilya sa Distrito Dos.”










