Gipahigayon ang testing sa bag-ong na-install nga Public Siren Alarm System ang lokal nga panggamhanan sa Ipil pinaagi sa Local Disaster Risk Reduction and Management Office o LDRRMO karong adlawa Nobyembre 18, 2026.
Gikatakdang ipatuman ang pagsulay sa sirena sa tulo ka higayon, una sa alas 8:00 sa buntag, alas 12:00 sa udto ug alas 5:00 sa hapon. Gipahibalo usab sa LGU nga testing lamang kini ug walay angay ikabalaka o ikataranta sa mga residente kon madungog ang sirena sa maong mga oras.
Tumong sa maong pagsulay nga masiguro ang husto nga pag-andar sa sistema ug ang pagkaandam niini nga gamiton sa paghatag og pasidaan ngadto sa publiko panahon sa emerhensiya ug kalamidad.
Gawas niini, gihisgutan usab sa LGU nga sa umaabot, mahimo nang gamiton ang maong sirena isip dugang nga pahibalo sa 10:00 sa gabii nga curfew nga padayon gihapong gipatuman sa lungsod.
Giawhag ang tanang residente nga sabton ug suportahan ang maong kalihokan tungod kay kabahin kini sa pagpalig-on sa kahandam ug kaluwasan sa komunidad, ilabi na sa panahon nga gikinahanglan ang paspas ug klarong pagpahibalo sa publiko.










