Arestado ang upat ka kabataang lalaki sa gipahigayong drug buy-bust operation sa City Drug Enforcement Unit o CDEU sa Koronadal City PNP, pasado alas-4:30 sa hapon niadtong Huwebes, Oktubre 1.
Gipahigayon ang operasyon sa Purok Sulatre, Barangay Zone 3, Koronadal City, South Cotabato
Giila sa kapulisan ang mga suspek nga mga alyas “Teody,” 20 anyos, online seller; “Windmill,” 23 anyos ug walay trabaho; “Fritz,” 20 anyos ug estudyante; ug “Kyle,” 20 anyos ug estudyante.
Narekober gikan sa mga suspek ang usa ka dako nga plastic bag nga adunay sulod nga dried marijuana leaves with stalk nga motimbang og dili moubos sa 153 gramos ug gibanabanang kantidad nga 18 mil pesos, lakip ang 500-pesos nga marked money.
Gipaabot nga pasakaan og kaso ang mga suspek tungod sa paglapas sa Sections 5 ug 11, Article 2 sa Republic Act 9165 o Comprehensive Dangerous Drugs Act of 2002.
Sa pagkakaron nakakustudiya na ang upat sa locked-up cell sa Koronadal City PNP ug giandam na ang tukmang kaso alang sa mga supetsado.
