Nasikop sa mga otoridad ang Top 9 Provincial-Level Most Wanted Person sa Sarangani Province nga adunay warrant of arrest alang sa kasong attempted murder, sa Purok Riverside, Barangay Kalaneg, Maitum, Sarangani Province niadtong Oktubre 1.
Nasakote ang suspek alas-4 sa hapon sa hiniusang operasyon sa Maitum Municipal Police Station, 2nd Special Police Mobile Force Company ug Sarangani Provincial Police Office-Provincial Intelligence Unit.
Misukol pa ang suspek sa pagdakop apan napugngan gihapon sa mga operatiba. Narekober sa iyang posisyon ang usa ka Colt caliber .45 nga armas, usa ka buhing bala nga nakachamber ug steel magazine nga adunay upat pa ka buhing bala.
Ang warrant of arrest batok sa suspek alang sa attempted murder adunay rekomendadong piyansa nga ₱120,000.
Gidugang usab ang posibleng paglapas sa Republic Act 10591 o Comprehensive Firearms and Ammunition Regulation Act tungod sa iyang kapakyasan sa pagpakita og dokumento nga nagtugot sa pagpanag-iya sa armas ug mga bala.
Gidala na sa kustodiya sa kapulisan ang nadakpan nga suspek alang sa tukmang proseso sa balaod, samtang ang narekober nga armas ug bala gitugyan alang sa hustong dokumentasyon ug legal nga proseso.
