Padayon karong gi-monitor sa City Disaster Risk Reduction and Management Department (CDRRMD) ang dagan sa panahon ug ang kahimtang sa syudad nunot sa nagpadayong hulga sa El Niño.
Matud ni Nick Jabagat, CDRRMD Head, nga bisan pa man og nakasinati og mga pag-ulan ang syudad sa milabay nga mga adlaw, igo lamang kini sa “below average” nga lebel. Tungod niini, gipahimangnoan niya ang publiko nga angayan gihapong pangandaman ang posibleng epekto sa mas grabeng El Niño.
Gihatagan usab og prayoridad sa ahensya ang sektor sa agrikultura pinaagi sa hugot nga pakig-alayon sa CDRRMD ug City Agriculture Office aron maminusan ang epekto sa grabeng kainit sa mga mag-uuma pinaagi sa paghatag og direktang hinabang.
Gawas sa agrikultura, gibutyag usab ni Jabagat nga lakip sa ilang gibantayan pag-ayo ang mga tinubdan sa tubig kon water sources. Gihimo kini aron madali og tubag kung adunay posibleng pagkahubas sa tubig nga mahimong mosangpot sa mas grabeng sitwasyon, diin kinahanglan na unya ang pag-ration og tubig sa mga apektadong komunidad.
Photo courtesy: Cagayan de Oro City Information Office
