Nasakmit sa mga kapulisan ang gibanabanang ₱3.26 milyon nga kantidad sa gituohang shabu ug upat ka mga suspek ang nadakpan sa managlahing anti-drug operations sa Cagayan de Oro City ug Camiguin niadtong Oktubre 1 ug 2, 2026.
Sa Cagayan de Oro City, nadakpan sa buy-bust operation sa Lower Tambo, Barangay Macasandig, alas-9:59 sa gabii niadtong Oktubre 1 ang duha ka suspek nga giila sa alyas “Bossing,” 35 anyos, ug “Eska,” 41 anyos.
Nasakmit gikan sa duha ang unom ka heat-sealed sachet nga adunay gituohang shabu nga motimbang og gibana-banang 470 gramos ug adunay Standard Drug Price nga mokabat sa ₱3.196 milyon. Nakumpiska usab ang usa ka sling bag ug ₱1,000 nga gigamit isip buy-bust money.
Samtang sa Camiguin, duha pa ka suspek nga giila sa alyas “Pat,” 35 anyos, ug “Mae,” 49 anyos, ang nadakpan atol sa implementasyon sa search warrants sa mga kapulisan ug PDEA-10 niadtong Oktubre 2, alas-2:25 sa kaadlawon.
Nakuha sa maong operasyon ang 10 ka sachet sa gituohang shabu nga motimbang og gibana-banang 10 gramos ug nagkantidad og ₱68,000, ingon man usa ka sachet nga adunay gituohang marijuana nga motimbang og 30 gramos ug nagkantidad og ₱3,600.
Anaa na sa kustodiya sa mga otoridad ang upat ka suspek ug giandam ang tukmang kaso batok kanila alang sa paglapas sa Republic Act 9165 o Comprehensive Dangerous Drugs Act of 2002. Ang mga nakumpiskang gituohang illegal drugs isumiter sa Regional Forensic Unit 10 alang sa laboratory examination.
Gipasalig ni PRO-10 Regional Director PBGen Nestor C. Babagay Jr. nga ipadayon ug palig-onon sa kapulisan ang intelligence-driven anti-drug operations sa rehiyon, subay sa balaod ug sa hustong proseso.
Photo courtesy: PRO X
