Gipahugtan sa Japan kaniadtong Huwebes ang mga rekisitos alang sa mga langyaw nga gustong mukuha og permanent residency, isip kabahin sa paningkamot ni Prime Minister Sanae Takaichi sa pag-estrikto sa kontrol sa imigrasyon. Subay sa bag-ong mga lagda nga ipatuman sa nagkalain-laing hugna, ang mga langyaw nga residente nga gustong magpuyo sa Japan sa permanenteng paagi kinahanglan nang pamatud-an nga ang ilang tinuig nga kita labaw sa average ug makahimo sila sa pagpakighinabi sa wikang Hapon.
Gipataas usab og 20 ka pilo ang bayronon sa pag-aplay sugod kaniadtong Huwebes, hinungdan nga gatosan ka mga tawo ang naglinya sa usa ka immigration office sa sentro sa Tokyo aron mahuman ang ilang mga proseso una pa man moabot ang pagsaka sa presyo. Bisan pa sa pasidaan sa mga eksperto ug lider sa negosyo nga kinahanglan sa nasod ang mga langyaw nga mamumuo tungod sa nagkagamay nga populasyon ug kakulang sa trabahante, nagkadako gihapon ang pagsupak sa imigrasyon tungod sa kabalaka sa uban ,bahin sa kahapsay ug kultura.
Matod ni Takaichi, samtang nagkataas ang gidaghanon sa mga langyaw nga residente, giatubang sa kagamhanan ang kabalaka ug gibati nga dili patas sa pipila ka mga lungsuranon, hinungdan nga gipursigi niya ang hapsay nga pagpuyo sa mga langyaw. Apan gipahinumdoman sa daghang mga eksperto nga kinahanglan gihapon ablihan sa Hapon ang ilang mga pultahan sa mga langyaw ug tabangan sila sa dugay nga pagpuyo pinaagi sa edukasyon ug saktong pagtagad aron makalahutay ang ekonomiya sa nasod.
Photo courtesy: Kentaro Takahashi/The New York Times
