Arestado ang usa ka 26 anyos nga lalaki nga tricycle driver ug residente sa Siay, Zamboanga Sibugay, human malambigit sa buy-bust operation sa mga kapulisan sa Imelda niadtong alas 5:40 sa hapon, niaging adlaw.
Sumala sa Zamboanga Sibugay Police Provincial Office, ang Municipal Drug Enforcement Team o MDET sa Imelda MPS maoy nagpahigayon sa intelligence-driven operation nga misangpot sa pagkadakop sa suspetsadong drug personality.
Nakumpiska gikan sa maong operasyon ang upat ka gagmay nga heat-sealed plastic sachet nga adunay puti nga crystalline substance nga gituohang shabu. Ang nakumpiskang kontrabando adunay gibana-banang gibug-aton nga 0.239 gramos ug gibanabanaang kantidad nga 1,625 pesos ug 20 sentimos.
Gidala ang nadakpan sa Imelda MPS alang sa dokumentasyon ug hustong disposisyon, samtang ang mga nakumpiskang drug items ipadala sa Zamboanga Sibugay Provincial Forensic Unit alang sa qualitative examination. Ang suspek gipahibalo usab sa iyang constitutional rights subay sa Miranda Warning ug Anti-Torture Act of 2009.
