Giila ni Presidente Ferdinand Marcos Jr. si Senate President Pro Tempore Sherwin Gatchalian isip lider sa Senado atol sa selebrasyon sa Independence Day sa Rizal Monument kagahapong adlawa Hunyo 12.
Sa iyang pakigpulong, gihisgutan ni Marcos si Gatchalian samtang nag-ila sa mga opisyal sa gobyerno nga mitambong sa flag-raising ug wreath-laying ceremony. Nakiglamano usab ang presidente kang Gatchalian atol sa kalihokan.
Kini maoy unang higayon nga sa publiko giila ni Marcos ang liderato ni Gatchalian sukad sa kontrobersyal nga pagbag-o sa liderato sa Senado niadtong Hunyo 3. diin 12 ka senador ang nagdeklara nga adunay quorum ug nagpabakante sa tanang piniling posisyon sa Senado, lakip ang pagka-senate president.
Human niini, napili si Gatchalian isip Senate president pro tempore ug giila sa iyang mga kaalyado nga acting Senate president. Giingon usab sa Malacañang nga si Gatchalian lamang ang ilang giilang lider sa Senado ug pinaagi kaniya ipasa ang tanang koordinasyon sa Ehekutibo.
Bisan pa niini, nagpadayon si Senador Alan Peter Cayetano sa pag-angkon nga siya gihapon ang “lehitimo ug legal” nga Senate president.
Photo courtesy: Senate of the Philippines
