Giawhag sa National Nutrition Council (NNC) sa Northern Mindanao ang mga ginikanan nga siguruhong masustansya ug balanse ang pagkaon nga ipabaon sa ilang mga anak karong pagsugod sa bag-ong tuig sa pag-eskwela.
Sumala ni NNC Regional Coordinator Reginaldo Guillen, mahimong gamiton sa mga ginikanan ang prinsipyo sa “MOVABA” o Moderation, Variety ug Balance isip giya sa pag-andam sa pagkaon, uban sa paggamit sa “Pinggang Pinoy.”
Gisugyot usab sa NNC ang mga barato apan masustansyang pagkaon sama sa rice, itlog, talbos sa kamote, kamatis ug saging aron makatabang sa hustong nutrisyon sa mga bata.
Giduso usab sa konseho ang pag-ilis sa mga tsitsirya ug tam-is nga ilimnon pinaagi sa prutas, mais, kamote ug tubig aron mapalambo ang panglawas sa mga estudyante.
Matod ni Guillen, importante usab nga maapil ang mga bata sa pag-andam sa ilang pagkaon aron makat-on sila sa pagpili og himsog nga pagkaon samtang sayo pa.
Photo courtesy: Sunlife PH
