Gipalig-on sa City Government ang information campaign kabahin sa husto nga pagdumala sa basura aron masiguro ang kalimpyo ug kahapsay sa mga komunidad sa dakbayan.
Sumala ni Konsehal Eric Salcedo, chairman sa Committee on Environment and Natural Resources, ang solid waste management dili lamang responsibilidad sa kagamhanang lokal kundili apil usab ang mga barangay ug matag panimalay.
Matod niya, padayon ang koordinasyon sa konseho ug sa City Local Environment and Natural Resources Office o CLENRO aron mapalig-on pag-usab ang mga Barangay Solid Waste Management Committee nga magmonitor sa implementasyon sa waste segregation sa matag barangay.
Lakip sa tutokan sa kampanya ang pagsumpo sa ilegal nga paglabay sa basura ug ang sayop nga oras sa pagpagawas niini nga kasagarang hinungdan sa pagtapok sa mga hugaw sa kadalanan.
Naglaum si Salcedo nga pinaagi sa kooperasyon sa tanang sektor, makab-ot sa dakbayan ang mas limpyo ug organisadong sistema sa pagkolekta sa basura.
Photo ocurtesy: City Councilor Eric Salcedo/ Facebook
