Mikaylap sa social media ang mga hulagway sa InterContinental Shanghai Wonderland, usa ka hotel nga morag gitukod sulod sa dakong bangag sa yuta. Tungod sa talagsaong disenyo niini, adunay uban nga nagtuo nga computer-generated lamang kini o dili tinuod nga lugar. Apan, katuohan kini ug dili edited nga hulagway.
Ang maong hotel nahimutang sa Songjiang District sa Shanghai, China ug giablihan niadtong Nobyembre 2018. Gitukod kini sa usa ka karaang abandonadong quarry o dakong hukay nga gibyaan sa pagmina. Sa 18 ka andana sa hotel, 16 niini ang nahimutang ilawom sa yuta samtang duha ka andana ang anaa pa gani ilawom sa tubig.
Gikonsiderar kini nga usa sa labing talagsaong hotel sa kalibutan tungod kay imbis motaas sama sa kasagarang skyscraper, kini “milusot paubos” ngadto sa quarry. Aduna kini’y kapin sa 300 ka kuwarto, uban niini adunay tan-aw sa ilawom sa tubig ug nag-atubang sa dagkong aquarium.
Busa, ang mga retrato sa InterContinental Shanghai Wonderland dili produkto sa artificial intelligence o digital manipulation. Tinuod kini nga hotel ug usa ka inhenyeriya ug arkitektural nga katingalahan nga gitukod sulod sa usa ka abandonadong quarry sa China.
Photo courtesy:senatus.net
