Gideklarang “cleared” na ang lungsod sa Titay gikan sa hulga sa bird flu human wala na’y nadugang nga positibong kaso sa maong sakit sa lugar.
Sumala ni Dr. Efren Davin sa Provincial Veterinary Officer, sa ilang surveillance, negatibo na ang mga sample nga nakuha sa lugar samtang naghulat pa sa uban pang final test results, nga nagpakita nga kontrolado na ang sitwasyon.
Bisan og gi-deklarang na ang Titay, nagpadayon gihapon ang hugot nga monitoring sa mga kasilingang lugar sama sa Diplahan ug uban pang silingang munisipalidad aron masiguro nga dili na mokatag ang maong virus.
Gipahimangnoan ni Dr. Davin ang mga mag-uuma ug poultry raisers nga makig-kooperar ug ipaubos sa surveillance ang ilang mga manok ug uban pang langgam. Dugang niya nga aduna pay pipila ka mga farm owners nga nagduha-duha sa pagpa-check sa ilang mga alaga.
Iyang gipasiugda ang kahinungdanon sa early detection aron malikayan ang pagkatag sa sakit, ug gipahimangnoan nga delikado kung mapasagdan tungod kay posibleng motakod usab sa tawo.
Nanawagan ang Provincial Veterinary Office sa publiko nga i-report dayon ang bisan unsang kaduda-dudang kamatayon sa mga manok o langgam aron dali nga matubag sa mga otoridad.
Photo Courtesy: Philippine News Agency
