Nasikop ang usa ka 24-anyos nga laborer nga giila sa alyas “Junior” atol sa anti-illegal drug buy-bust operation nga gipahigayon sa kapulisan sa Police Station 11–Baguio sa Baguio District, Davao City.
Gipangulohan ang operasyon ni PMAJ Fil Anthony D. Manlitacan, Acting Station Commander. Narekober gikan sa suspek ang gibanabanang 0.6 gramos nga gituohang shabu nga nagkantidad og 4,000 pesos.
Atol sa operasyon, gipahibalo sa mga kapulisan ang suspek sa iyang mga katungod ubos sa Konstitusyon. Gihimo usab ang pag-imbentaryo sa mga nakuhang ebidensya atubangan sa suspek ug sa gikinahanglang mga saksi, subay sa gitakdang pamaagi sa balaod.
Gidala ang mga ebidensya alang sa laboratory examination ug gitugyan ngadto sa exhibit custodian subay sa hustong proseso. Mag-atubang ang suspek sa kasong paglapas sa Republic Act No. 9165 kun Comprehensive Dangerous Drugs Act of 2002, subay sa resulta sa imbestigasyon ug sa hustong legal nga proseso.
