Wala na kaikyas pa sa mga otoridad ang usa ka batan-ong lalaki human nadakpan atol sa gikasang operasyon didto sa Paquibato District, Davao City pasado alas 7:00 sa gabii niadtong Oktubre 14, 2026.
Ang operasyon gihimo sa mga personahe sa Paquibato Police Station, uban sa koordinasyon sa Regional Special Operations Group 11 nga miresulta sa pagkasikop ni alyas “Rensjay,” 19-anyos, giila isip Top 1 Regional Most Wanted Person.
Ang suspek nadakpan pinaagi sa pagpatuman sa warrant of arrest alang sa kasong Statutory Rape nga giisyu sa Regional Trial Court, 11th Judicial Region, Branch 12, Davao City pinitsahan niadtong Oktubre 12, 2026.
Human sa pagpatuman sa maong warrant, gidala ang nadakpang indibidwal ngadto sa Paquibato Police Station alang sa hustong dokumentasyon ug dugang nga legal nga proseso subay sa gitakdang mga pamaagi.
Photo courtesy: Paquibato Police Station
