Gibutyag ni Ellen Adarna nga ang Temple of Leah wala gitukod isip usa ka tourist destination, apan karon nahimo na kini nga usa sa labing iladong laaganan sa Cebu.
Gipadayag ni Ellen nga ang maong templo gitukod sa iyang namatay nga lolo nga si Teodorico Adarna isip pasidungog sa iyang asawa nga si Leah, hinungdan nga gitawag kini nga “Taj Mahal of Cebu.”
Matod pa ni Ellen, dili gyod laaganan ang unang tuyo sa pagtukod niini tungod kay daghan kaayong mga butang ug koleksiyon ang iyang lola sa ilang balay.
Gisaysay usab niya nga dili ganahan ang iyang lola nga ibaligya ang iyang mga kabtangan ug makalingaw pa gani kining mosulti nga mangmulto siya kon adunay mosulay pagbaligya niini.
Tungod niini, nakahunahuna ang pamilya nga gamiton ang ilang yuta sa Busay, Cebu isip tipiganan sa mga personal nga gamit sa iyang lola.
Sumala kang Ellen, ang Roman-inspired nga disenyo sa maong estruktura bunga lamang sa gusto sa iyang lolo.
Photo Courtesy: MyDramalist
