Nisaad ang Philippine Sports Commission (PSC) nga mohatag og tag-P250,000 nga ayuda sa mga pamilya sa Ateneo basketball players nga sila Rene Baterbonia ug Divine Adili nga namatay sa Dipaculao, Aurora.
Kini ang gipahibalo ni PSC Chairman Pato Gregorio atol sa usa ka press conference diin gihisgutan usab niya ang mga lakang aron matubag ang nahitabong insidente.
Matod ni Gregorio, ang maong kantidad kabahin sa suporta sa gobyerno aron makatabang sa mga panginahanglanon sa mga pamilya sa duha ka atleta.
Samtang, gidayeg usab sa PSC ang paspas nga aksyon sa Commission on Higher Education (CHED) nga paglusad og fact-finding investigation ug naghatag og psychosocial assistance sa mga nahibiling pamilya.
Nagkasabot usab ang mga sports stakeholders nga suportahan ang Sports Coaching Act aron masiguro ang hustong training, lisensya ug sertipikasyon sa mga coaches sa nasud.
Dugang pa, palig-onon usab ang mga safety protocols ug emergency response measures sa tanang sports activities aron malikayan ang susamang trahedya sa umaabot.
Matod sa PSC, bisan dili na mabalik ang kinabuhi sa mga atleta, mahimo silang pasidunggan pinaagi sa mga reporma nga makapaluwas ug makapanalipod sa ubang mga atleta sa umaabot.
Photo Courtesy: PHILIPPINE NEWS AGENCY
