Marami ang nagalak sa pahayag ni Moro National Liberation Front o MNLF founder Nur Misuari na suportado niya ang pananatili ni Abdulraof Macacua bilang Chief Minister ng Bangsamoro Autonomous Region in Muslim Mindanao o BARMM.
Sa kanilang pagkikita sa tahanan ni Misuari sa Davao City noong Oktubre bente-dos, binati niya si Macacua sa pagkakahalal bilang miyembro ng Bangsamoro Parliament sa halalan noong Setyembre katorse, dos mil bente-sais, ayon kay Misuari, buo ang kanyang suporta kay Macacua, at binigyang-diin niyang kailangan ng rehiyon ang mga lider na maaaring mamuno sa pamahalaang Bangsamoro.
Si Macacua ay kabilang sa walumpung bagong halal na miyembro ng Bangsamoro Parliament na nakatakdang magtipon para sa inaugural session ngayong Oktubre trenta. Sa naturang sesyon, sisimulan ang proseso ng pagpili sa susunod na Chief Minister ng rehiyon, kailangan ng isang nominado ng hindi bababa sa apatnapu’t isang boto upang makuha ang mayorya sa walumpung mambabatas.
Samantala, bumuo ng alyansa ang apatnapu’t anim na bagong halal na miyembro ng parliament, kabilang si Macacua, sa isang workshop sa Davao City. Layunin ng grupo na isulong ang isang pamahalaang kumakatawan sa iba’t ibang sektor at komunidad sa BARM, nagtapos naman ang panunungkulan ni Macacua bilang interim Chief Minister sa pagsisimula ng unang sesyon ng mga bagong halal na mambabatas. Itinalaga siya sa puwesto ni Pangulong Ferdinand Marcos Jr. bago ang unang halalan para sa Bangsamoro Parliament.
Si Macacua ang pangulo ng Bangsamoro Federalist Party, habang si Misuari ay matagal nang kilalang lider ng MNLF at naging regional governor ng dating Autonomous Region in Muslim Mindanao o ARMM, sa nalalapit na pagpili ng bagong Chief Minister, magiging mahalaga ang mga boto at kasunduan ng mga mambabatas. Gayunman, ang pahayag ng suporta ni Misuari ay hindi nangangahulugang tiyak na si Macacua na ang mahahalal, dahil nakasalalay pa rin ito sa desisyon ng Bangsamoro Parliament.
