Gisugdan na sa Department of Education o DepEd Region 9, ang implementasyon sa Three-Term School Calendar alang sa School Year 2026-2027 subay sa DepEd Order Number 009, Series of 2026.
Matod ni DepEd 9 Curriculum and Learning Management Division Chief Eugenio Penales, ubos sa bag-ong kalendaryo, bahinon ang school year sa tulo ka termino nga adunay Opening Block, Instructional Block ug End-of-Term Block aron mas organisado ug episyente ang proseso sa pagtudlo ug pagkat-on.
Lakip usab sa maong sistema ang Enrichment Block nga ipatuman sulod sa napulo ka adlaw diin pagahimoon ang mga enrichment activities alang sa mga estudyante aron mapalig-on ang ilang mga kahibalo ug kahanas.
Matod pa ni Penales, ang Three-Term School Calendar kabahin sa mga reporma sa DepEd aron mas mapalambo ang learning outcomes sa mga estudyante ug mapalig-on ang implementasyon sa Academic Recovery for Accessible Learning (ARAL) Program sa Zamboanga Peninsula.
Gilauman sa DepEd 9, nga pinaagi sa bag-ong school calendar, mas mapauswag ang kalidad sa edukasyon ug mas matubag ang learning gaps nga nasinati sa mga estudyante sa miaging mga tuig sa Zamboanga Peninsula Region.
