Namatay ang Korean singer nga si Kim Yoon Seol niadtong Hunyo 7, 2026, sa edad nga 27- anyos. Hangtod karon, wala pa gipadayag sa iyang pamilya ug management ang opisyal nga hinungdan sa iyang kamatayon.
Nailhan si Kim Yoon Seol isip “Singer No. 6” sa sikat nga singing competition nga Sing Again 4, diin nakigsangka usab siya sa Filipina singer nga si Gwyneth Dorado. Tungod sa iyang talagsaong talento ug makapahinganghang tingog, nakadani siya og daghang mga fans sulod ug gawas sa South Korea.
Sa wala pa ang iyang kalit nga pagpanaw, nagplano pa unta siya og live broadcast alang sa iyang mga fans. Sa iyang katapusang mensahe sa social media, iyang giingnan ang iyang mga fans nga magkita sila alas-8 sa gabii sa sunod adlaw. Kini nga post karon nahimong emosyonal nga handumanan alang sa iyang mga supporters.
Nisikat si Kim Yoon Seol sukad sa iyang pagdaog sa The Voice Kids Korea niadtong 2013. Mipadayon siya sa iyang karera pinaagi sa pag-apil sa nagkadaiyang singing programs ug pagpakita sa iyang talento sa musika.
Samtang nagpadayon ang pagbubo sa iyang pahasubo gikan sa mga fans ug kaubang artista, daghan ang naghinumdom kaniya isip usa ka buotan, mapainubsanon, ug talentadong performer nga mibiya sa kalibutan sa sayo kaayo.
Photo Courtesy:Latestly
