Nangayo ang kampo sa pamilya sa Ateneo basketball player nga si Rene Baterbonia sa Department of Justice (DOJ) nga magpagawas og Immigration Lookout Bulletin Order (ILBO) batok sa head coach sa Ateneo Blue Eagles nga si Tab Baldwin.
Matod ni Atty. Israelito Torreon, abogado sa pamilya Baterbonia, tumong sa maong hangyo nga masiguro nga hapsay ug walay babag nga mapadayon ang imbestigasyon kalabot sa pagkamatay sa duha ka mga mandudula.
Giklaro usab sa abogado nga sa pagkakaron wala pa sila’y direktang giakusahan nga responsable sa insidente, lakip na si Baldwin. Kahinumdoman nga namatay sila Rene Baterbonia ug Divine Adili human malumos sa dagat sa Dipaculao, Aurora niadtong Lunes atol sa team-building activity sa ilang koponan.
Samtang, mitambong sa haya ni Baterbonia ang iyang mga kauban sa Ateneo Blue Eagles aron makigduyog sa kasubo sa pamilya. Nakiglamay usab ang mga opisyal gikan sa Commission on Higher Education (CHED), Department of Education (DepEd), ug Philippine Sports Commission (PSC).
Gilauman nga madala na sa Agusan del Sur karong adlawa, Hunyo 11, ang mga patayng lawas ni Baterbonia alang sa katapusang paghatag og pasidungog sa iyang pamilya ug mga higala.
Subay niini, gimandoan na sa Department of Justice ang National Bureau of Investigation (NBI) nga magtukod og espesyal nga task force aron maghimo og lawom, komprehensibo ug patas nga imbestigasyon sa maong trahedya.
Tumong sa imbestigasyon nga masuta kung adunay igo nga basihanan alang sa pagsang-at og kaso may kalabotan sa pagkamatay sa duha ka atleta.
Sa inisyal nga imbestigasyon sa kapulisan sa Aurora, wala pa’y nakitang timailhan sa foul play ang maong insidente.
Photo courtesy: Edge Davao
