Gikompirmar ni Police Major Anthony Luy sa Opol Municipal Police Station nga mihinay na ang kalihokan sa ilegal nga pagmina sa lugar sa Limonda, Opol human sa kapin usa ka bulan nga monitoring nga gihimo sa mga otoridad.
Matod ni Luy, padayon pa sa pagkakaron ang ilang re-accounting ug validation aron masuta kon adunay nahibiling mga aktibidad sa maong lugar. Apan base sa ilang obserbasyon, daghan na sa mga nag-operate kaniadto ang mibiya tungod kay dili na matud pa mapuslanon o alkansi na ang operasyon.
Dugang pa niya, nga namatikdan usab ang pagkunhod sa mga kalihokan sa suba sa Iponan, ilabina sa mga lugar nga kaniadto ginaingong adunay illegal mining activities.
Gipasabot sa opisyal nga dako ang natabang sa padayon ug konsistenteng operasyon sa Cagayan de Oro City Police Office o COCPO batok sa ilegal nga pagmimina, hinungdan nga mikunhod ang mga kalihokan sa mga lugar.
Bisan pa niini, gisiguro sa kapolisan nga magpadayon ang ilang monitoring ug koordinasyon sa ubang ahensya aron mapugngan ang pagbalik sa ilegal nga pagmimina ug mapanalipdan ang kinaiyahan sa mga komunidad.
Photo courtesy: Opol Mps
