Patay ang usa ka 44-anyos nga lalaki, human kini nakuryentihan samtang namul-ong sa mga sanga sa kahoy didto sa Purok 10, Kauswagan, Barangay Miaray, Dangcagan, Bukidnon niadtong Lunes sa hapon Hunyo 07, 2026.
Giila sa mga awtoridad ang biktima nga si Russel dal Trogue, usa ka residente sa maong dapit.
Matod sa mga taho, nahitabo ang insidente pasado alas-5 sa hapon human lang gyud mihunong ang ulan. Nikatkat ang biktima sa kahoy aron pul-ongan ang mga sanga ug dahon nga giingong nakasagbot na. Human makapamutol og pipila ka sanga sa ibabaw, monaug na unta apan aksidente niining natumban ang usa ka sanga sa kahoy nga duna nay ground sa kuryente gikan mismo sa main line.
Tungod sa kakusog sa boltahe, daling nawad-an og panimuot ang biktima ug nagpabiling nagbitay nga wala nay lihok sa ibabaw nga bahin sa punoan nga duol kaayo sa linya sa kuryente. Giingong nadugayan og gamay una pa kini nakuha tungod sa kataas sa pwesto ug sa kakuyaw sa kuryente.
Pinaagi sa paggamit og mga pisi ug mabinantayong pagtinabangay sa mga personahe sa Dangcagan Municipal Disaster Risk Reduction and Management Office (MDRRMO) ug mga kaubang responders, hinay-hinay ug malampuson nga napaubos ang lawas ni Trogue ug dinalian kining gidala sa labing duol nga tambalanan, apan gideklara na kining patay na.
Photo Courtesy: Kram Lig Llenas
