Gipangayoan ni Ombudsman Jesus Crispin Remulla ang mga kanhi bodyguard ug staff nga giingong konektado kang kanhi Ako Bicol Representative Zaldy Co, nga magsumiter sa ilang tagsa-tagsa ka gipanumpaang affidavit. Matod ni Remulla, mahinungdanon nga makahatag og bulag nga testimonya ang matag indibidwal aron makatabang sa nagpadayong imbestigasyon sa Office of the Ombudsman kalabot sa giingong maanumalyang flood control projects.
Nakatakdang moatubang sa mga imbestigador ang maong mga nagpaila nga “bag-men” ni Co karong Hunyo 11, 15, ug 16 sa kasamtangang tuig. Sumala ni Assistant Ombudsman Mico Clavano, dugay na nilang gikaistorya ang mga nalambigit nga indibidwal aron masiguro nga masusi ang tanang posibleng ebidensiya sa maong giingong anomalya.
Gibutyag usab ni Atty. Levi Baligod, ang tigpamaba sa 18 ka “maleta boys”, nga andam ang iyang mga kliyente nga magpakita og dugang mga ebidensiya sama sa mga hulagway ug video nga magpamatuod sa maong pagpanghatag og kuwarta.
Una nang miakusar ang grupo nga duna’y mga opisyal ug inilang personalidad ang midawat og mga maleta nga puno sa kuwarta ubos sa sugo sa kasamtangang pugante nga si Zaldy Co.
Photo Courtesy: Phalertofficial
