Gipahamtangan ug suspension sa executive bureau sa International Criminal Court (ICC) si Chief Prosecutor Karim Khan taliwala sa giatubang niining mga alegasyon sa sexual misconduct o pang-abusong sekswal. Ang desisyon gihimo pinaagi sa qualified majority sa 21-member bureau sa Assembly of States Parties (ASP), ang nagdumala nga lawas sa ICC, samtang nagpadayon pa ang pag-analisar sa maong kaso.
Giklaro sa bureau nga ang pagpatuman sa suspension dili pa timailhan sa pinal nga resulta sa imbestigasyon. Kahinumduman nga giakusahan si Khan sa usa ka babayeng empleyado nga nagtrabaho sa iyang opisina tungod sa giingong indecent behaviour o dili maayong pamatasan.
Nagsugod ang maong kontrobersiya niadtong sayong bahin sa tuig 2024 diin mialegar ang maong babayeng assistant nga giharas siya ug gipugos ni Khan sa pipila ka dili angay nga mga buhat. Sa wala pa ang opisyal nga suspensiyon karong Hunyo 2026, si Khan boluntaryo na nga nagduso og leave of absence niadtong Mayo 2025 aron mahatagan og dalan ang maong pakisusi.
Sa iyang bahin, makapila na usab nga hugtanong gihimakak ni Khan ang tanang mga pasangil batok kaniya. Sa pagkakaron, pabilin nga nag-ung-ong ang pinal nga desisyon sa maong bureau nga maoy giila nga competent decision-maker sa maong isyu sulod sa korte aron masuta kung duna ba gyud kini kamatuoran
Photo Courtesy: Reuters Baghdad
