Mikunhod ang ratio sa mga walay trabaho sa Pilipinas ngadto sa 4.7% niadtong Abril 2026, mas ubos itandi sa 5.0% nga natala niadtong Marso. Subay sa pinakabag-o nga datos nga gipagawas sa Philippine Statistics Authority (PSA), gibanabana nga 2.41 ka milyong Pilipino ang walay trabaho sa maong buwan, mas gamay kon itandi sa 2.58 ka milyon sa miaging bulan.
Sumala ni PSA National Statistician Undersecretary Claire Dennis Mapa, miuswag usab og dyutay ang employment rate sa nasod nga nitaas ngadto sa 95.3% niadtong Abril 2026. Kini katugbang sa 48.89 ka milyong mga Pilipino nga aduna na’y kasamtangang panginabuhian ug trabaho.
Nagpasabot ang maong pagkunhod sa unemployment nga adunay hinay-hinay nga pagbawi sa mga bakanteng trabaho sa merkado. Nahitabo kini luyo sa kamatuoran nga nagpadayon gihapon ang pag-atubang sa nasod sa mga dagkong hagit sama sa mas taas nga panggastos sa panginabuhi ug ang nagpadayong krisis sa enerhiya.
Bisan pa man niining binulan nga pag-uswag, ang unemployment karong panahona nagpabilin gihapong mas taas kon itandi sa 4.1% nga natala niadtong Abril 2025. Kini nagpakita nga ang labor market sa nasod anaa pa gihapon sa proseso sa hingpit nga pagbawi kon itandi sa dagan sa miaging tuig
Photo Courtesy:PSA
