Narekober sa kapolisan sa San Fernando, ang usa ka gikawat nga Honda XRM 125 ug nadakpan usab ang suspek nga giila sa alyas nga “Romeo,” residente sa Barangay Durian.
Sumala sa imbestigasyon, nadiskobrehan sa tag-iya nga nawala ang iyang motorsiklo nga giparking duol sa iyang trabahoan niadtong Hunyo 5, apan nireport lang siya sa kapolisan niadtong Hunyo 9 human makadawat og impormasyon sa posibleng nahimutangan niini.
Gidala sa mga pulis sa San Fernando Municipal Police Station ang tag-iya ug gisugdan ang follow-up operation. Alas-10 sa buntag sa maong adlaw, sa Barangay Mabuhay, nakita ug gipahunong ang suspek samtang nagsakay sa maong motorsiklo.
Human sa verification, napamatud-an nga tugma ang chassis ug engine number sa motor nga gireport nga nawala. Ang suspek ug ang motorsiklo gidala sa police station para sa dokumentasyon ug dugang imbestigasyon, ug andam na ang kasong ipasaka batok kaniya.
Gipahinumdoman usab sa kapolisan ang publiko nga daling ireport ang pagkawala o pagpangawat sa motorsiklo o sakyanan aron mas paspas ang recovery ug pagdakop sa mga responsable
Photo Courtesy: PRO -10
