Gipanawagan ni Konsehal Alan Ryan Legaspi sa City Engineer’s Office (CEO) ug Office of the Building Official (OBO) ang dinalian nga pagpahigayon og structural integrity inspection sa mga building sa syudad, ilabina sa mga tunghaan. Gihimo sa konsehal ang maong lakang human sa bag-ohay nga kusog nga linog nga niigo sa Habagatang Pilipinas.
Atol sa iyang privilege speech sa 47th Regular session sa Sangguniang Panlungsod, gipadayag ni Legaspi ang iyang lalum nga simpatiya ngadto sa mga pamilya nga naapektuhan sa maong katalagman. Iyang gihugtan nga importante kaayo ang pagsusi sa kahimtang sa mga imprastruktura sa syudad karon aron masiguro ang kaluwasan sa publiko, ug duna na siya’y giplano nga resolusyon aron pormal nga hangyoon ang maong mga opisina sa pag-inspeksyon.
Alayon niini, gitaho usab ni City Councilor Dindo Zoltan Dinlayan sa konseho gikan sa Local School Board diin nasuta nga anaa sa 88 ka mga eskwelahan na ang gisusi human sa linog. Sa maong ihap, nakita nga 38 ka mga classrooms ang nakaangkon og minor damages (gamay nga kadaot) ug duha ka classrooms ang nakasinati og grabeng kadaot, apan hinuon walay natala nga totally damaged o naguba gyud sa hingpit ug pabiling luwas alang sa mga estudyante.
Luyo niini, nipaambit usab sa iyang habig si Legazpi diin iyang gipahimutang nga kinahanglan gyud nga maapil sa gipalapdan nga inspeksiyon ang mga kolehiyo, unibersidad, ug uban pang mga pribado ug publikong building sa syudad. Matod pa niya, kini nga lakang gikinahanglan aron malikayan ang mas dako nga kadaot ug masalbar ang kinabuhi sa mga tawo kung ugaling duna ma’y mosunod nga katalagman
Photo Courtesy: 10th SP – Malaybalay City
