Gihangyo ngadto sa hawanan sa konsuho nga tun-an pag-ayo ang gisugyot nga 40% nga dugang singil sa serbisyo sa tubig sa Cagayan de Oro City District (COWD) tungod dungag palas-anon kini sa mga konsumante.
Sumala pa ni Konsehal Roger Abaday nga mas maayo unang palambuan sa COWD ang ilahang performance ayha maningil og dugang sa ilahang serbisyo tungod sa reyalidad, daghan gihapon sa mga konsumante ang nag-antos sa ilahang dili maayo nga serbisyo.
Gikan sa hinay nga presyur sa tubig, putol-putol hangtud sa walay agas ug dili tin-aw nga tubig ang makuhang serbisyo sa mga konsumante. Kung maaprubahan pa kining 40% nga increase, mupasaka kini sa minimum nga bayranan sa residential gikan P218 ngadto sa p294.
Giklaro sab ni Abaday nga walay legal nga awtoridad ang Konseho sa pag-apruba ug pagreject sa water rate increase, apan dako ang ilahang mahimo lakip na ang executive department isip mga representante sa kawtahan ug maghatag og komunikasyon ngadto sa hingtungdang mga ahensya nga nakatutok sa operasyon sa COWD.
Giawhag sab niya ang katawhan nga musalmot sa ginapahigayon nga public consultation sa COWD ngadto sa kabarangayan aron nga personal nilang mapaabot sa COWD ang ilahang mga mulo.
Photo courtesy: Cagayan de Oro City Council
