Andam nga motambong ning adlawa ang mga opisyal sa Executive Department sa Misamis Oriental sa committee hearing sa Sangguniang Panlalawigan kabahin sa giproposang compromise agreement alang sa mga biktima sa aksidente nga gikalambigitan sa heavy equipment sa lalawigan.
Sumala kang Provincial Administrator Ruel Gayoso, tumong sa Executive Department nga ipatunga ang mga kawani sa Kapitolyo, ilabina gikan sa engineering department, aron matubag ang mga pangutana ug mahatagan og katin-awan ang insidente.
Ang hearing maghisgot sa resolusyon nga may kalabutan sa compromise agreement nga gisumite sa Executive Department sa miaging semana alang sa paghatag og assistance sa mga nabiktima sa disgrasya.
Matod pa ni Gayoso, importante ang partisipasyon sa mga hingtungdan aron mapresentar ang mga detalye sa panghitabo ug matabangan ang konseho sa pagrepaso ug pagdesisyon sa maong resolusyon.
Gilauman nga pinaagi sa hearing, mas masabtan sa mga miyembro sa Sangguniang Panlalawigan of Misamis Oriental ang kahimtang sa insidente ug ang basehan sa giproposang compromise agreement.
Photo courtesy: Misamis Oriental Information Office
