Natapos sa mga Persons Deprived of Liberty (PDL) Senior High School learners sa Bukidnon Provincial Detention and Rehabilitation Center (PDRC) ang Academic-Focused Bridging Program (AFBP). Sa gipahigayong culmination program, mapasigarbuhon nadawat sa mga learners gikan sa Grade 11 ug Grade 12 ang ilang mga Certificates of Completion, kagahapon Hunyo 05, 2026.
Gilusad ang maong programa uban sa Impasugong National High School pinaagi sa Alternative Learning System kun ALS, nga gidisenyo aron mapalig-on ang ilang katakus sa mga core subjects alang sa ilang pagtuon.
Gitambungan ang maong kalihokan sa mga kadagkoan gikan sa DepEd Division of Bukidnon ug mga opisyal sa tunghaan ug pasilidad. Sa iyang pamahayag, gihatagan og gibug-aton ni Provincial Warden Nelson Rocky Balaba nga ang edukasyon maoy usa ka mahinungdanong aspeto sa rehabilitasyon nga maghatag og dalan sa personal nga paglambo ug saktong pagbalik sa katilingban sa mga PDL.
Gipasiugda ni Ms. Roselle Ferber, ang Principal sa Impasugong National High School, ang dakong gahom sa edukasyon aron mabag-o ang kinabuhi sa usa ka tawo. Sa iyang mensahe, iyang gidasig ang mga learners nga magpadayon sa pagpaningkamot alang sa personal nga kalambuan ug positibong kausaban sa unahan.
Nagpakita ang kalampusan sa maong bridging program sa hiniusang tinguha sa PDRC ug sa DepEd sa paghatag og patas nga kalidad sa edukasyon sulod sa mga correctional facilities. Giduso niini ang mensahe nga ang edukasyon nagpabilin nga usa ka gamhanang kagamitan alang sa kausaban ug paghatag og ikaduhang higayon sa kinabuhi sa mga piniriso
Photo Courtesy: PDRC – Bukidnon
