Patay ang usa ka ahente sa real estate human gipusil didto sa Purok 7, South Poblacion, lungsod sa Maramag, Bukidnon, pasado alas 3:55 sa hapon Biyernes, Hunyo 05, 2026. Giila ang biktima nga si Rencie Vasquez Capua, hamtong ang panuigon, minyo, ug residente sa San Carlos, Bagontaas, sa dakbayan sa Valencia.
Base sa inisyal nga imbestigasyon sa Maramag Municipal Police Station, paingon na unta mosulod sa iyang sakyanan ang biktima uban sa iyang kaubang ahente nga si Flordeliza Apaap Cabasa, dihang kalit kining giduolan sa armado ug wala mailhing lalaki. Sa walay langan, gipusil sa suspek ang biktima sa makausa ka higayon, samtang wala hinuon maunsa ang kauban niyang babaye.
Human sa maong pagpamusil, abtik nga misakay ang gunman sa usa ka motorsiklo diin naghulat ang nagmaneho niining kauban, ug daling misibat paingon sa amihanang bahin sa maong lungsod.
Gidala pa unta sa mga responders sa MDRRMO-Maramag ang biktima ngadto sa balay-tambalanan, apan nakabsan gayod kini sa iyang kinabuhi ug wala masalbar sa nag-atimang doctor nga si Dr. Paulo Jerome Enguito.
Sa karon, personal nga gipangulohan ni Police Lieutenant Colonel Alexander Eugenio, ang hepe sa Maramag MPS, ang alert team ug duty investigators alang sa lawom nga pakisusi sa krimen. Nakig-alayon usab ang lokal nga kapulisan sa Bukidnon Provincial Forensic Scene Unit alang sa pagproseso sa nahitaboan, samtang padayon pang gisuta ang motibo sa maong pagpamusil aron mailhan ug madakpan ang mga mikalagiw nga suspek.
Photo Courtesy: Maramag Municipal Police Station
