Nahimong talagsaong inspirasyon si Sister Babylyn Dulfo, human mahimong usa sa mga nakabenepisyo sa scholarship program sa dakbayan ug giila isip unang madre nga nakadawat sa maong oportunidad.
Si Sister Babylyn, 52-anyos ug residente sa Barangay 26, adunay kapin 25 ka tuig nga pagserbisyo isip missionary ubos sa Franciscan Order of the Atonement. Sumala kaniya, dugay na niyang pangandoy nga makapadayon og kolehiyo apan wala kini matuman human siya misulod sa pagka-madre sa edad nga 18-anyos.
Dako ang iyang kalipay sa pagkahibalo nga nakapasar siya sa scholarship examination bisan pa nga dugay nang panahon sukad sa iyang katapusang pag-eskwela ug wala siya nakapangandam pag-ayo alang sa eksaminasyon.
Mapasalamaton usab si Sister Babylyn kang Mayor Rolando ‘Klarex’ Uy ug sa City Education and Development Office, sa paghatag og higayon sa mga Kagay-anon nga makapadayon sa ilang edukasyon, ilabina sa mga gikan sa kabus nga pamilya.
Sa pagkakaron, nag-eskwela siya sa kursong Associate in Computer Technology sa Capitol University aron makat-on og mga kahanas sa kompyuter nga iyang magamit sa pagserbisyo ug pagtudlo sa mga kabatan-onan isip kabahin sa iyang pastoral nga misyon ug pagmentorar sa mga altar servers.
Photo courtesy: CDO City Scholarships Office
