Gipahinumdoman ni Cagayan de Oro City Mayor Rolando ‘Klarex’ Uy ang tanang department heads sa City Hall sa Cagayan de Oro nga sigurohong maaprubahan una ang Request for Employment (RE) sa mga job order personnel sa dili pa sila ipasugamak sa trabaho.
Matod sa mayor, importante nga masunod ang hustong proseso aron malikayan ang pagkalangan sa pagproseso ug pagpagawas sa sweldo sa mga JO workers.
Gipasabot nga adunay mga higayon diin adunay mga reklamo sa social media mahitungod sa nadugay nga sweldo, apan nakaplagan nga wala pa diay makumpleto ang gikinahanglang mga dokumento ug requirements.
Sumala sa tigpamaba sa mayor nga si Janboy Actub, tumong sa direktiba nga masiguro nga patas ang pagtratar sa tanang JO personnel ug malikayan ang mga problema sa administratibong proseso.
Gidugang pa nga pinaagi sa pagsunod sa tukmang pamaagi sa pag-empleyo, masiguro nga madawat sa mga job order workers ang ilang sweldo sa husto ug tukmang panahon.
Photo courtesy: Cagayan de Oro-LGU
