Gi-target sa Department of Energy (DOE) nga mapaspasan ang proseso sa pagkuha og permit alang sa pagtukod sa electric vehicle (EV) charging stations sa nasud.
Matod ni DOE Director Patrick Aquino, nakigtambayayong na sila sa ubang ahensya sa gobyerno aron makahimo og memorandum nga mopayano ug mopadali sa pag-apruba sa mga permit alang sa maong mga pasilidad.
Lakip sa mga ahensyang kauban sa DOE mao ang Department of the Interior and Local Government (DILG), Department of Public Works and Highways (DPWH), ug Anti-Red Tape Authority (ARTA).
Sa pagkakaron, moabot og unom ka bulan ang pagproseso sa permit alang sa EV charging stations, apan gitinguha sa gobyerno nga mapamub-an kini sama sa nahitabo sa net metering system nga gikan sa 20 ka adlaw nahimong 10 ka adlaw na lamang.
Sumala kang Aquino, aduna na karon kapin 1,600 ka EV charging stations sa Pilipinas ug target nga madugangan kini ngadto sa 7,000 sa tuig 2028.
Giingon usab niya nga ang pagdaghan sa charging stations makatabang sa pagsaka sa paggamit sa electric vehicles, ilabina karon nga nagkadako ang interes sa publiko sa alternatibong transportasyon ug renewable energy tungod sa mga kabalaka sa suplay ug presyo sa imported nga krudo.
Photo Courtesy: Malaya Business Insight/PNA
