Gihimakak og gikondena sa kampo ni Fr. Flaviano “Flavie” Villanueva, ang alegasyong nakadawat siya og kwarta gikan kang kanhi Ako Bicol Party-list Representative Elizaldy “Zaldy” Co.
Matod sa Arnold Janssen Foundation Incorporated, walay kamatuoran ang maong mga pasangil ug gisugdan na nila ang legal nga mga lakang batok sa mga responsable niini.
Kini nga isyu migawas atol sa hearing sa Senate Blue Ribbon Committee diin giingon sa usa ka nagpailang kanhing Marine nga si Joely Cadiao nga nakahatod siya og sobre nga adunay kwarta ngadto kang Villanueva duol sa usa ka simbahan sa Mindanao Avenue sa Quezon City.
Apan, gipasiugda sa Foundation nga walay klarong simbahan nga gihisgutan sa testigo ug walay parokya, simbahan, o ministry centers sa Society of the Divine Word nga motakdo sa deskripsyon nga gihatag sa maong saksi.
Dugang pa sa Foundation, ang mga alegasyon dili lamang bakak kondili malisyoso ug makadaot sa dungog sa pari nga dugay nang nag-alagad sa mga kabos ug nagtabang sa mga pamilya sa mga biktima sa extrajudicial killings o EJK.
Giklaro usab sa kampo ni Villanueva nga dili nila tugotan nga madaot ang reputasyon sa pari tungod sa mga alegasyong walay lig-ong basehan. Ilang gibarugan nga panubagon pinaagi sa balaod ang mga tawo nga miakusar ug nagsulti og dili tinuod.
Samtang, ubang mga opisyal ug kanhing mambabalaod nga nalambigit sa susamang alegasyon mipagawas usab og paghimakak sa maong mga pasangil.
Photo courtesy: Gabriel P. Lalu/ Inquirer
