Mobisita si Chinese President Xi Jinping sa North Korea, sunod semana alang sa duha ka adlaw nga state visit ug pakighimamat kang North Korean leader Kim Jong Un. Kini ang unang pagbisita ni Xi sa Pyongyang sukad 2019 ug una usab niyang biyahe sa gawas sa nasud karong tuiga.
Gilauman nga hisgutan sa duha ka lider ang pagpalig-on sa relasyon sa China ug North Korea, nga dugay nang kaalyado apan nakasinati og kabugnaw sa relasyon sa miaging mga tuig. Giingon sa China nga ang maong panagtagbo makatabang sa kalinaw ug kalig-on sa rehiyon.
Nagpataas usab kini og mga espekulasyon nga posibleng mahimong tigpataliwala si Xi tali sa Estados Unidos ug North Korea, ilabina human makighimamat si Xi kang US President Donald Trump niadtong Mayo. Usa sa ilang gihisgutan mao ang tumong nga mapahunong ang programa sa nuclear weapons sa North Korea.
Samtang nagpadayon ang mga paningkamot diplomatiko, mipadayag si Kim Jong Un niining semanaha nga paspasan pa sa iyang nasud ang pagpalig-on sa nuclear forces niini bisan pa sa mga internasyonal nga silot.
Ang pagbisita ni Xi motakdo usab sa ika-65 nga anibersaryo sa Treaty of Friendship, Cooperation and Mutual Assistance tali sa China ug North Korea, nga nagpakita sa padayon nga importansya sa ilang relasyon taliwala sa nagkainit nga mga isyu sa kalibutan.
Photo courtesy:France 24
