Posibleng mosaka ang presyo sa diesel samtang gilauman usab ang bag-ong rollback sa gasolina sa umaabot nga semana, sumala sa pinakabag-ong pagtantiya sa merkado sa petrolyo.
Base sa talaan sa Mean of Platts Singapore (MOPS), ang presyo sa diesel mahimong mosaka og tali sa P4.00 hangtod P4.50 matag litro. Sa laing bahin, ang gasolina posibleng mokunhod og P1.00 hangtod P1.50 matag litro.
Matod sa MOPS, misaka ang presyo sa krudo ug mga refined fuel products tungod sa kabalaka sa nagpadayong tensyon sa internasyonal nga diplomasiya ug posibleng pagkaputol sa suplay sa lana.
Usa sa mga hinungdan mao ang paghunong sa negosasyon alang sa kasabotan sa kalinaw ug ang bag-ong hulga sa Iran nga posible nilang sirad-an ang Strait of Hormuz, usa sa labing importante nga agianan sa suplay sa lana sa kalibotan.
Dugang pa, adunay kabalaka nga mahimong mokunhod pag-ayo ang global oil inventories kon magpadayon ang kasamtangang kusog sa paggamit ug pagkuha sa mga reserba sa lana.
Kahinumduman nga niaging semana, nagpatuman ang mga kompanya sa petrolyo og dako nga rollback sa gasolina, diesel ug kerosene. Ang pagkunhod sa presyo niabot gikan sa P4.76 hangtod P10.86 matag litro.
Sa pagkakaron, naglihok tali sa 76 hangtod 84 pesos matag litro ang presyo sa mga produktong petrolyo sa nagkadaiyang lugar sa nasud.
Padayon nga gitutokan sa mga motorista ug sektor sa transportasyon ang kalihukan sa presyo sa langis tungod sa epekto niini sa adlaw-adlaw nga pagpanginabuhi.
