Gikuwestiyon karon ni Senador Erwin Tulfo ang kalit nga pagkawala sa mga ngalan nilang Senador Loren Legarda ug Senador Mark Villar sa testimonya sa 18 ka mga kanhing miyembro sa Philippine Marines. Kini atol sa gipahigayong pagdungog sa Senate Blue Ribbon Committee kabahin sa giingong mga anomalya sa mga flood control projects sa nasod.
Matod ni Tulfo, nalakip matod pa sa mga unang affidavit sa mga kanhing Marines ang mga ngalan nilang Legarda ug Villar, apan natingala kini kung ngano nga wala na kini mabalik sa aktwal nga pagdungog sa Senado. Gibutyag sa senador nga sila lamang ni Senate President Vicente “Tito” Sotto III ang gihisgutan sa mga testigo may kalabotan sa alegasyon sa pagdawat og maleta nga adunay sulod nga minilyong kuwarta—usa ka pasangil nga hugot nga gihimakak ni Senador Sotto.
Tungod niini, gikwestiyon usab ni Tulfo ang nahitabong pagdungog sa laing Blue Ribbon panel nga gipangulohan ni Senador Pia Cayetano, diin gihulagway niya kini nga usa ka “one-sided” o bias nga hearing.
Agig dinalian nga aksyon, gipahibalo ni Tulfo nga iyang ipatawag pag-usab ang mga kanhing Marines sa iyang kaugalingong komite karong umaabot nga Lunes, Hunyo 8, aron matubag ang mga isyu ug mga detalye nga wala matud pa mahisguti sa maong pagdungog.
Photo Courtesy: File Photo/ Senate of the Philippines
