Nagtukod karon og lima ka ektaryang fire line ang City Government of Malaybalay pinaagi sa City Environment and Natural Resources Office (City ENRO) diha sa Ngog2x Ridge, Sitio Natid-asan, Barangay Casisang. Ang maong dinalian nga lakang, nga gipaluyohan usab sa City Peace and Order Council (CPOC), gihimo human sa bag-ohay lang nga insidente sa sunog sa kabukiran sa maong dapit nga miabot ug nakatap na ngadto sa silingang Barangay Can-ayan.
Gawas nga usa kini sa labing epektibong pamaagi aron mapugngan ang pagkaylap sa wildfire o sunog sa kalasangan, gilakip usab sa City ENRO ang mga miyembro sa lokal nga komunidad sa pagpanglimpyo ug pagtangtang sa mga daling masunog nga sagbot ug mga uga nga dahon. Pinaagi niini, nakuhaan ang risgo sa sunog sa kabukiran samtang nakahatag pa kini og temporaryong panginabuhian alang sa mga lokal nga lumulupyo sa maong mga dapit.
Tungod niini, hugot karong giawhag sa City ENRO ang tanang naghupot sa CADT ug CADC areas, ingon man ang mga tagdumala sa mga kalasangan ug watershed sa syudad, nga magtukod usab og ilahang kaugalingong mga fire line ug buffer zones. Katuyoan niini nga mapanalipdan ang natural nga kahinguhaan sa Malaybalay aron masiguro ang suplay sa tubig ug mapreserba ang balanse sa ekolohiya alang sa umaabot nga henerasyon.
Photo Courtesy: City ENRO – Malaybalay City
