Ginaatubang karon sa Roads and Traffic Administration sa Cagayan de Oro City ang kakulang sa manpower nga ma-deploy sa mga importanteng lugar sa syudad atol sa pagsugod sa klase sunod semana.
Matud kang RTA Spokesperson James Andrade, kulang pa sa pagkakaron ang ilang mga traffic enforcers aron mabutangan ang tanang strategic areas nga gilauman nga adunay dagsang trapiko sa pagbalik sa mga estudyante sa eskwelahan.
Bisan pa niini, giingon ni Andrade nga gitun-an na sa RTA ang mga pamaagi aron mahatag sa hustong lugar ang ilang mga personnel ug mas epektibong magamit ang anaa nga manpower.
Tumong sa ahensya nga masiguro ang hapsay nga dagan sa trapiko ug kaluwasan sa mga estudyante, ginikanan, ug motorista atol sa unang mga adlaw sa pagbukas sa klase.
Padayon usab ang koordinasyon sa RTA sa ubang ahensya aron matubag ang posibleng pagsaka sa volume sa mga sakyanan sa mga dalan sa dakbayan.
