Napakyas ang Pilipinas nga makakuha og pwesto isip non-permanent member sa United Nations Security Council (UNSC) human midaog ang Kyrgyzstan sa botohay alang sa representante sa Asia-Pacific Group.
Sa gipahigayon nga ikaupat nga hugna sa botohay, nakakuha ang Kyrgyzstan og 142 ka boto batok sa 49 ka boto sa Pilipinas, hinungdan nga nakab-ot niini ang labing una niining pwesto sa Security Council.
Dungan niini, napili usab isip mga bag-ong non-permanent member sa UNSC ang Zimbabwe, Austria, Portugal, ug Trinidad and Tobago.
Ang UNSC usa sa labing gamhanang sanga sa United Nations nga adunay gahom sa pagpagawas og mga resolusyon, lakip na ang pagpahamtang og economic sanctions, pagpakatap og peacekeeping forces, ug pag-aproba sa mga aksyong militar.
Puy-an sa Zimbabwe ang pwesto sa Somalia, samtang muhulip ang Trinidad and Tobago sa Panama. Pulihan usab sa Portugal ug Austria ang Denmark ug Greece, samtang ang Kyrgyzstan ang mopuli sa Pakistan.
Magpabilin usab isip mga non-permanent member hangtod sa katapusan sa tuig 2027 ang Bahrain, Colombia, Democratic Republic of the Congo, Latvia, ug Liberia.
Ang lima ka permanenteng miyembro sa Security Council ang China, France, Russia, United Kingdom, ug United States.
Photo courtesy: United Nations
