Posibleng mag-atubang ang Pilipinas og dugang buhis o tariffs nga mosaka ngadto sa 12.5 porsyento sa pipila ka mga produkto nga ginapasulod niini sa Estados Unidos.
Kini human gipahibalo sa Office of the US Trade Representative (USTR) nga nalakip ang Pilipinas sa 54 ka mga nasod nga napakyas sa pagpatuman og balaod nga nagbawal sa pagsulod sa mga produkto nga hinimo gikan sa forced labor o pinugos nga pamuo. Matod ni USTR Ambassador Jamieson Greer, kining kapakyasan naghatag og dili makiangayong bentaha sa mga negosyo batok sa mga kompanya sa Amerika, hinungdan nga gamiton sa US ang Section 301(b) sa ilang Trade Act of 1974 aron papason ang binuhatan pinaagi sa dugang buhis.
Tungod kay ang Pilipinas walay klaro ug tiunay nga pagdili sa pag-import og mga produkto gikan sa forced labor, ipahamtang ang mas taas nga 12.5-porsyento nga tariff kumpara sa 10 porsyento lang alang sa mga nasod nga adunay saktong kasabutan o regulasyon sa isyu sa forced labor. Hinuon, giklaro sa USTR nga dili maapektuhan o gawasnon sa dugang buhis ang pipila ka nag-unang exports sa Pilipinas, lakip na ang mga produktong agrikultural sama sa lubi, saging, pinya, ug mangga, uban ang mga hilaw nga mineral sama sa nickel, ug mga piniling semiconductor devices. Ang sugyot nga buhis dili pa pinal tungod kay maghulat pa ang USTR og mga komento ug tubag gikan sa mga naapektuhang nasod hangtod karong Hulyo 7.
Depensa usab ni Department of Trade and Industry (DTI) Undersecretary Allan B. Gepty pinaagi sa usa ka position paper, aduna’y lig-on nga ligal nga pundasyon ang Pilipinas batok sa forced labor base sa Konstitusyon ug mga internasyonal nga kasabutan. Gipasabot niya nga ang kakuwang sa usa ka eksplisitong pagdili sa pag-import sa mga produkto wala nagpasabot nga ang polisiya sa nasod dili makatarunganon o nakababag sa komersyo sa Amerika. Gidugang ni Gepty nga nakatutok na karon ang Pilipinas sa pag-atiman niini nga isyu aron mas mapalambo ang sistema sa pamatigayon subay sa kalambuan sa tibuok kalibutan.
Photo courtesy: Rappler
