Gibutyag ni Ade Fajardo nga gitahod ni kanhi House Speaker Ferdinand Martin Romualdez ang proseso sa balaod ug andam siyang atubangon ang mga pasangil batok kaniya subay sa hustong proseso sa korte.
Kini ang iyang gipahayag human ang Office of the Ombudsman mipasaka og kasong plunder batok kang Romualdez kalabot sa giingong korapsyon sa mga proyekto sa imprastraktura.
Matod pa ni Fajardo, giila nila ang interes sa publiko bahin sa kaso, apan ang kriminal nga tulubagon kinahanglan matino base sa ebidensyang ipresentar sa korte ug ubos sa mga lagda sa hustisya.
Dugang pa niya nga wala mangayo si Romualdez og espesyal nga pagtratar, kondili hustong proseso ug patas lamang nga pagdungog sa kaso, sama sa katungod nga gihatag sa matag Pilipino.
Kahibaloan nga ang Office of the Ombudsman mipasaka og kasong plunder batok kang Romualdez, kanhi Ako Bicol party-list Representative Zaldy Co, ug duha pa ka mga akusado atubangan sa Sandiganbayan, diin ang kaso may kalabotan sa giingong mga kickback o ilegal nga komisyon nga mokabat sa kapin P7 bilyon.
Photo Courtesy:GMA news
